ئىلى مەشرىپى 2024- يىلى 7- ئاينىڭ 28- كۈنى (يەكشەنبە) تۈركىيە ئىستانبولدا ئائىلە بويىچە يىللىق دالا سەيلىسى يىغلىشى ئۆتكۈزدى. بۇ قېتىملىق يىغىلىش ئىلى مەشرەپ يىگىت بېشىمىز جۈرئەت غۇلجا ئەپەندىمنىڭ رىياسەتچىلىكىدە، مەشرەپ ئەزالىرىنىڭ قوللىشى ۋە بەزى قېرىنداشلارنىڭ ئاك تىپ كۈچ چىقرىشى بىلەن مۇۋاپىقىيەتلىك تاماملاندى. تۈركىيەدىكى ۋە غەرب ئەللىرىدىكى ئەزالار، بالا-چاقىلىرى بىلەن قاتناشتى.

مۇھاجىرەتتىكى بۇرۇختۇرمىلىقتىن بىر دەم بولسىمۇ قۇتۇلۇپ، شەھەرنىڭ شاۋقۇن-سۈرەنلىرىدىن ئۇزاق، تەبىئەت قوينىدا ئۆتكۈزۈلگەن بۇ دالا سەيلىسىدە ئەر- ئاياللارغا ئايرىم سورۇنلار تەييارلانغان بولۇپ، ئەركىن-ئازادە مۇھىت ھازىرلاندى. ياش-ئۆسمۈرلەر ۋە بالىلار ئۈچۈن تەييارلانغان مۇكاپاتلىق پائالىيەتلەر ئېلىپ بېرىلدى.

يىگىت بېشى ۋە چوڭلار كۆڭۈل سۆزلىرىنى قىلدى. چەت ئەللەردە ئېلىپ بېرىلىۋاتقان داۋالار تونۇشتۇرۇلۇش بىلەن بىللە، بۇنىڭدىن كېيىن نېمىلەرنى قىلىش توغۇرلۇق توختالدى. مۇھاجىرەتتە قۇرۇلغان ئىلى مەشرىپىنىڭ ئەھمىيىتى تەكىتلەندى. ۋەتەن مۇستەققىلىقىغا بىرلىكتە كۈچ قۇشۇش ھەققىدە مۇزاكىرىلەر ئېلىپ بېرىلدى.

ئىلى مەشرىپىگە يېڭى قېتىلغان يۇرتداشلار بىلەن تونۇشۇش، ئۇزۇندىن بېرى كۆرۈشەلمىگەن قېرىنداشلار بىلەن دىدارلىشىش، ئاياللار ۋە قىزلارنىڭ پۈتمەس-تۈگمەس ئائىلە ئىشلىرىدىن بىر كۈن بولسىمۇ قۇتۇلۇپ دەم ئېلىشى، ياش-ئۆسمۈر ۋە بالىلارنىڭ تونىشىشى، دوستلىشىشى مەقسەت قىلىنغان بۇ يىغىلىش چوڭلارنىڭ خۇرسەن، ياش-ئۆسمۈرلەرنىڭ خۇشال، بالىلارنىڭ شادىمان ھالدا ئۆيىگە قايتىشى بىلەن كۆڭۈللۈك تاماملاندى.